Сите ние при купување на нов дом највеќе се фокусираме на квалитетот и удобноста на домот, но неретко го забораваме оној бирократски дел од купопродажбата кој е круцијален во процесот.
Откако ќе одберете стан, брокерите Ви нудат преддоговор и договор за купоподажба кои им даваат сигурност на двете страни дека договорот ќе биде исполнет. Овој вид на договори обично содржи стандардни клаузули, но бидејќи секоја купопродажба е различна им дава на страните слобода да вметнат членови во договорот кои сметаат дека се неопходни.
Важни работи кои Вие како купувач треба да ги проверите се, дозвола за градба, енергетски сертификат, да се осигурате дека предметниот стан не е предмет на хипотека, да утврдите дека не постојат други законски пречки за пренесување на недвижноста, како и начинот на кои се составени договорот и преддоговорот.
Договорот за купопродажба треба да содржи одредени задолжителни одредби
- Предмет на договорот
Според чл.38 ст.2 Договорната обврска мора да биде возможна, дозволена и определена ,односно определива.
Во договорот мора да стои за што точно се работи, без генерализирање на работите. Секогаш треба да бидат наведени – катастарска парцела, број на имотен лист, точна површина и локација. Доколку предметот не е определен договорот е ништовен.
- Права и обврски на купувачот
Во овој дел од договорот треба да бидат наведени сите обрски но и права кои ги имате Вие како купувач. Стандардните одредби најчесто гласат вака:
– Купувачот е должен да при прием на станот кој го купува ги провери и утврди сите недостатоци кои е можно да се јават. Недостатоците е важно да бидат пријавени на продавачот за истите да можат да бидат санирани благовремено.
Втора обврска која се јавува за купувачот е да ја исполни паричната обврска која ја има спрема продавачот. Во договорот може да стои и т.н. „затезна камата“ која купувачот ќе треба да ја плати доколку доцни со исплатата.
- Права и обврски на продавачот
Продавачот како страна во договорот има свои права и обврски. Една од обврските да е да го гарантира квалитетот на станот. Да ги обезбеди сите документи кои ја докажуваат сопственоста, како и навремено да го предаде на купувачот. Меѓутоа постои начин кој го ослободува продавачот од обврската за навремено предавање на станот, а тоа е институтот наречен „виша сила“. Вишата сила предвидува ситуации кои не зависат од купувачот, како на пример земјотрес, застој на државните органи – штрајк и сл.
- Купоподажна цена и рок на плаќање
Купопродажната цена треба да биде определена уште при самите преговори. Купувачот треба да биде известен за сите дополнителни трошоци кои можат да се јават. Бидејќи сите оние доградби кои можат да Ви бидат понудени, а не стојат во стандардиот план за зградата предизвикуваат дополнителни трошоци и ја зголемуваат цената.
Рокот на плаќање е одреден затоа внимавајте тој рок да биде исполнет, бидејќи поголемиот дел од договорите предвидуваат затезни камати.
Во секој случај, читајте ги договорите, консултирајте се со стручни лица и избирајте проверена фирма од која ќе го купите Вашиот дом. Потрудете се да ова искуство го направите што помалку стресно за Вас.